Yth yw gans muer a drystans res yw dhym deryvas dheugh bos agan Caderyer kens hag esel bewnans a enor Agan Tavas, Craig Weatherhill, marow. Craig re be ow suffra yehes drog nans yw nebes bledhynyow saw yn despyt an dra ma yth esa ef ow pesya gans y ober hag y whythrans hag y dhyllansow. Y vernans a vyth coll muer dhe’n bys studhyansow Kernow. Nans yw seythen ef a gemeras Pewas an Kemeneth dheworth Gorsedh Kernow wosa commendyans ragtho gans Agan Tavas.
Muer aswonys a ve Craig avel ystoryor Kernow specyly an randyr Penwyth hag arbennegor hynwyn tylleryow ha dylynyer tylleryow ystorek. Y gerensa an moyha dhodho a ve mergh ha nyns ova moy lowen ages pan esa ow whythra randyr Penwyth war geyn margh.
Coll bras yw y vernans dhe Gernow ha lyes coweth.