Manylyon bewnans Mighal Josef yw scant. Ev o dhyworth renkas uvel hag awos y fowt a rychys, nyns eus meur a govadow scrifys gesys lemmyn. Fentynnyow scrifys a’n oos na ny dhisqweth saw y vos gov dhyworth Lannaghevran. An titel ‘An Gov’ neb a sew y hanow, yw y greft yn sempel. Dres an bledhynnyow, an titel na a dheuth ha bos hanow teylu kernewek ‘Angove’. Kyn nag esa adhyscans na rychys dhodho, dell esa dh’y genhembrenkyas Thomas Flamank – laghyas a Vosvena- yn y blu, kemeneth vyhanna ha moy kevrennys, den a vri lowr o ev.
Ny wodhon ni travyth a-dro dh’y deylu. Heb mar yth o ev mab dhe nebonan ha martesen demedhys. Neb unn covadh an blu (mil, pymp cans ha pymp warn ugens) a dhisqwedh bos whath tri den henwys An Goff po Engoff ena, neb eth bledhen warn ugens wosa an executyans. Martesen mebyon po noyens ens?
An poblans a Lannaghevran y’n dydhyow na o a-dro dhe dhew cans ha peswar gour warn ugens, brassa rann anedha arvethys yn ameth ha pyskessa. Nyns esa balweyth yn pluw Lannaghevran vytholl. Gelfornow kepar ha’n huny Mighal Josef o cres bewnans an dreveglos. Res o dhe bubonan y usya rag gwruthyl hag ewnhe an daffar a res rag’ga ober.
Dhe dhiwedh an pymthegves cansvledhen, yth esa meur a ober rag nowedhy eglos Lannaghevran ha, martesen, arvedhys o Mighal Joseph rag gwitha lymm an toulys menweyth.
Y hyllir desevos meur a glapp orth tan an wovel.
Dell hevel, ev a wrug kerdhes a-hys agan hynsow, pyskessa y’n mor, gormola y’n eglos hag omlowenhe an gwelyow mar aswonys genen hedhyw.
Ny wodhon mar qwrug ev ynia gwerin an bluw po mars o ev dewisys avel hembrenkyas, mes ni a wor ev dhe dhiberthy yn mis Me po Metheven y’n vledhen mil, peswar cans seytek ha peswar ugens dhe dhalleth an keskerdh hir dhe Londres, ow cuntel holyoryon a-hys an fordh, rag govenegy an myghtern. Martesen ev a wre gwruthyl po ewnhe an toulys hag arvow sempel degys gans an werin.
Res yw kemeres campollow scrifys a-dro dhodho gans rach, henn a greg war an scrifor ha fatel vynnir ev dhe hevel – erbynner wordhi po muskok, y wriansow a gows rag y honan.
Yn sertan, yth esa ganso gallos dhe wul lelder yn y holyoryon. Yth o ev nebonan dhe estemya rag Kernowyon hag y vammyeth o yn lycklod Kernewek. Ev a ylli kewsel yn freth gans an re a gewsi Kernewek yn kynsa ha, martesen, yn unnik. Dell hevel, nyns ens i rout, mes dooth ha skoodhys yn ta gans an dus y’n tylleryow tremenys war an fordh.
Mighal Josef o hardh ha determys yn sur. Herwydh scrifer yn cita Londres: An rebels a spenas an nos yn predery meur, rag neb anedha tybyans dhe dhos bys y’n myghtern rag hebcor yn-dann y dregeredh ha gras yn tien, mes yth esa dhe’n gov brys conter.
Wosa bos dalghennys, ny wrug ev hockya. Herwydh an Great Chronicles, ev a dheuth:
“ow marghogeth a-dryv gwithyas an myghtern, an gof gwiskys yn jerkyn a wynn ha gwyrdh – liwyow an myghtern – hag a borthas cher da hag a gewsis mar hardh dhe’n bobel dell wrug ev orth rydhses.”
Whath pan o ev ledys war-tu ha Tyburn rag executyans euthyk, yth esa ev ow postya yndellma:
“dhe gavos hanow anhedhek, ha gerda fast hag anvarwel.”
Scryfys gans Karen Richards, Ystoryor Lanheveran, hag a wruk trelyans ha fylmya gans Esther Johns